बेटी पतिव्रत धरम जगत में सै सूं बड़ो हुवै
●बा ई सुहागण बड़भागण है जिकी सदांई पति री आज्ञा में हुवै
●राजस्थानी रामलीला मांय सीता हरण , बाली - सुग्रीव जुद्ध आद रै मिस दीरिजी घणी समाजु सरोकारां री सीख
सूरतगढ़ 21अक्टूबर ( राजस्थानी रामलीला समचार , सूरतगढ )
राजस्थानी रामलीला री छठी रात री लीला मांय सुंदरी स्वरूपनखा , खर - दूषण वध , सीताहरण , भीलणी रा बैर , बाली - सुग्रीव जुद्ध आद लीलावां रो मंचन राजस्थानी संवाद अदायगी रै साथै रोचक ढंग सूं करीज्यो । बनवास रै दिनां सती अनुसुइया सीता रै मिस सगळी लुगायां नें सीख देंवता कैवे कै बेटी पतिव्रत धरम जगत में सै सूं बड़ो हुवै । बा ई सुहागण बड़भागण है जिकी सदांई पति री आज्ञा में हुवै । रावण रो बाबै रौ भेख धारगे पंचवटी में आवणों अर सीता सूं कैवणों कै , जे भिक्षा देणी है तो रेखा सूं बारै आ माई । जोगी बाबा कद लेवै है इण तरिया भिक्षा माई । सीता - देवर री आंण रैवे ना रैवे , राखूंली धरम गिरस्थी रो , अबै म्हे रेख उलांघ गे पाळूं हूं धरम गिरस्थी रो । भीलणी जद राम लिछमण नें चाख - चाख’र बोरिया देवै पण लिछमण ऐठयोड़ा समझ’र फेंक देवै है तद राम कैवे - लिछमण थे खाया कोनि देखो तो सरी कितरा मीठा है.....आ बोरिया में भगती रो नेह भरयो है। नहीं , जात - पात री बात अठै परेम मारग अलबेलो है। सुग्रीव री हिमायत मांय जद राम दरखतां रै ओलै , तीर मारै तद बाली उणां नै ओळमो देवतों कैवे कै म्हनै निर्दोष नै क्यूं मारयो ? जणा राम कैवे बेटी , भैण , बेटै री बहु अर छोटे भाई री नारी , आने देखै माड़ी दीठ सूं , बो मारण जोग दुराचारी ।
पांवणा आरती करगे लीला कराई सरु
सिरे पांवणा लडडू मुदगल भगवान श्रीराम री आरती करी अर समाजसेवी जगदीश जोशी हड़मान जी री आरती करगे लीला सरू करवाई । पांवणा आपरी बात ठेठ राजस्थानी भासा राखता थंका कैयो कै सूरतगढ़ रै लोगां रो मायड़ भासा सारू राजस्थानी रामलीला रो ओ प्रयोग घणो महताऊ है जिणसूं भासा आंदोलन ने घणी तकड़ाई मिलसी अर राजस्थानी बेगी ई आठवीं पानड़ी में रळसी । राजस्थानी मांय राखी अर राजस्थानी रामलीला रै सदस्या अर मानता आंदोलन सूं जुड़्योड़ा सगळा जणा नैं भरोसो दिरायो कै राजस्थानी भासा सारू जिको कीं करण जोगो होसी बो करस्यूं ।
इण मोकै पर आयोड़ा दर्शकां आप रा विचार राखतां कैयो कै , सगळी भासावां ने मानता , राजस्थानी ने टाळो क्यूं । म्हारी जुबान रो ताळो खोलो , ओ सवाल राज सूं पूछो । अबै बगत आयग्यो है जद राजस्थान री जनता राजस्थानी ने आठवीं अनुसूची मांय भेली करवाय’र ई मानसी । केंद्र सरकार नें ओ काम खांड खायर करणो चाइजै । मनोजकुमार स्वामी कैयो महात्मा गांधी , गुरुदेव रवींद्र नाथ टैगोर जेड़ा जद सगळा जननायक देस मं त्रिभाषा सूत्र रा हिमायती रैया है तो और कोई कारण कोनी बणै कै राजस्थानी आठवीं अनुसूची में भेळी न करी जावै । म्है सगळा इण संघर्स नें सिरै तांई पुगाय'र ई सांस लेवांला ।
अै बण्या लीला रा पात्र
छठी रात री लीला में राम - राजेश लाम्बा , लक्ष्मण - प्रदीप बाजीगर , सीता - दिव्या भाकर , रावण - मनोजकुमार स्वामी अर नारायण औझइया , मारीच - तपश , खर - राहुल बिश्नोई , दुषण - अनिकेत , मायामृग - तपेश , जटायू - अतिकेत , सुरपण खां - पारूल , गौरव सैन , नितिन , अनुसुईया - टीना पारीक , अत्री रीसी - कमल , हनुमान - संजय बिश्नोई , सुग्रीव - विनोद औझइया , बाली - धीरज स्वामी , तारा - तनुज , सबरी - आपरी कला रा जौहर दिखाया । मंच संयोजन रोहितास सारस्वत कर्यो अर अशोककुमार , हरीशकुमार , स्वामी रामलीला नै फेसबुक पर दिखावण रो काम सम्हाळयो । बठै‘ई निरदेसण राकेश शर्मा अर मनोजकुमार स्वामी करयो । अध्यक्ष सत्यनारायण तावणिया अर संरक्षक मुरलीधर उपाध्याय दरसकां रौ आभार जतायो।
कोई टिप्पणी नहीं:
एक टिप्पणी भेजें