भुआ-भतीजी सामेळा में भेळी हुई गांव री सगळी बेट्यां
नागौरः 28 दिसम्बर। परबतसर तैसिल रा चिताई गांव में एक अनूठो कार्यक्रम हुयो जठै दो सौ बेटियां भैळी हुयी एक साथ। बेटी रै भाग में जिण घर जळमै उण सूं विदाई लिखी है उण सूं गांव छूटै मां बाप छूटै साथ ई साथ बै सखियां भी छूट जावै जिण रै साथ छोटी सूं मोटी हुवै ।
ब्याव रै पाछै आपसरी में मिलणो नीं हुवै पैली कोई ब्याव हुवतो तो पांच गांव भैळा होता सबसूं मिलणो हो जातो आज या परंपरा सुकड़ती सुकड़ती खुद रै घर ताणीं सुकड़गी अब ब्याव में ई घर री भैण बेटियां भैळी हुवै तो बेटियां आपसरी में बीस बीस साल बीत जावै मिल नीं पावै तो यो गांव इण पीड़ नै समझी अर एक आयोजन करियो सगळी भैण बेटियां नै नूंतो दियो अर एक दिन गांव में एक साथ जंवाईसा रै साथ बुलाया,
भैण बेटियां नै चूंदड़ी ओढाई अर स्मृति चिन्ह दियो , सगळा जंवांयां नै साफा भेंट करिया। सामूहिक भजन संध्या राखी आगलै दिन सामूहिक जीमण अर सांस्कृतिक कार्यक्रम भी राख्यो । कैई भैण बेटियां बीस बीस साल बाद मिली उणरी खुसी रो ठिकाणो नीं हो गांव री बाड़ी बेटियां सूं महकगी । चिड़कल्यां आपरै गांव में एक साथ भैळी जो हुयी ही । ऐड़ा आयोजन हर गांव में हुवणा चाइजै एक चोखी सरूआत करी है चिताई गांव।
कोई टिप्पणी नहीं:
एक टिप्पणी भेजें