मनोज स्वामी रो हुयो सूरतगढ रै इतिहास में स्सै सूं बडो नागरिक सनमान
●राजस्थानी भासा सारू पूरो परिवार 37 बरसां सूं कर रेयो है खैचळ :- उपाध्याय
सूरतगढ
राजस्थानी साहित्यकार manoj kumar swami मनोज कुमार स्वामी रो राजस्थानी भासा सारू समरपण देखतां, राजस्थानी रामलीला रो सिरजण, लगोलग भासा री मान्यता रै संघर्ष नैं आगै बधावणै अर मायड़ भासा राजस्थानी री रामलीला रो लगोलग नोंवै बरस भी मंचन सारू राजस्थानी रामलीला रा पाटवी सत्यनारायण तावणिया, रूंखाळणहार मुरलीधर उपाध्याय, पृथ्वीराज स्वामी, ताराचंद निराणियां, जगदीश स्वामी, अर्जुन जोशी आद मनोजकुमार स्वामी नै इक्यावन हजार रिपिया नगद, शॉल, नारेळ भेंट करगे नागरिक अभिनंदन करयो।
मुरलीधर उपाध्याय केयो कै 37 बरसां सूं पूरो परिवार ई राजस्थानी भासा री सेवा कर रेयो है। संसाधनां री कमि रै बावजूद राजस्थानी री जोत नैं बुझण कोनी दी। आपां सगळा मिल'र चालस्यां तो राजस्थानी भासा नैं मानता जरूर मिलसी।
इण सूं पैलां सत्यवादी राजा हरीशचन्द्र तारामती नाटक रो मंचन हुयो। साच री करड़ी परख पर खरो उतरतो हरीशचन्द्र, तारामती अर रोहितास रै अभिनै दरसकां नै गळगळा कर दिया।
पार्षद बिरमादेवी तावणिया, राजस्थानी रामलीला मंचन 2023 रा पाटवी सत्यनारायण तावणिया हरीशचन्द्र रो पाछो राजतिलक करयो।
हरीशचन्द्र तारामती नाटक मांय:-
हरीशचन्द्र - विकास सारस्वत, तारामती - संजय बिश्नोई, रोहितास - धिरेन, सेठ - रामकुमार पुरोहित, सेठाणी - प्रमोद बिश्नोई, नछतर - राकेश शर्मा, विश्वामित्र - विनोद औझइया, नरतकी - कार्तिक, कलुवा - राहुल बिश्नोई बण्या। मंच संचालन रोहितास सारस्वत करयो। आरती रा पावणा डॉ निशान्त स्वामी, संजय गुप्ता, मीना, नीलम स्वामी रेया।
ऑनलाईन वोटिंग सूं दीरीज्या सिरै पुरस्कार :-
राजस्थानी रामलीला रै 2023 रै मंचन नै देस विदेस मांय देखणिया दरसकां री कलाकारां रै टाळवै अभिनै सारू हुई वोटिग सूं पांच सिरै पुरस्कार राजस्थानी रामलीला अवार्ड 2023 भी दीरीज्या। जिणमांय बेस्ट फिमैल एक्ट्रेस - दिव्या भाकर (सीता), बेस्ट मेल एक्टर रामादल - संजय बिश्नोई ( हड़मान ), बेस्ट एक्टर रावणदल - रामकुमार पुरोहित (मेघनाद) , ऑलओवर बेस्ट एक्टर - विनोद औझइया (सुग्रीव), बेस्ट एक्टर 2016 से 2023 तांई - प्रदीप जसूजा (लिछमण) नै दीरीज्यो।
कोई टिप्पणी नहीं:
एक टिप्पणी भेजें