Marwar Mahotsav : मरुधराधीस महाराजा गजसिंह जी जोधपुर रा सानिध्य में गांव टापरवाड़ा में मनीजसी मारवाड़ महोत्सव।
धोरां धरती सौवणी,जबरो गढ़ जोधान।
सती जती अर सूरमा,केसर बरणी शान।।
Marwar Mahotsav : परबतसर तेसिल रा छोटासा गांव टापरवाड़ा में तारीख 27 मार्च 2024 नै उगैला दोय सुरजी।
~~~~~~~~~~~~~~~~~~~~~~~~~~~~~~
मारवाड़ रा छोटासा गांव टापरवाड़ा में तारीख 27 मार्च 2024 रै दिन मरुधराधीस हिज हाईनेस महाराजा गजसिंह जी जोधपुर पधारैला। इण औसर माथै मारवाड़ री सगळी पिरजा घणा लाडां कोडां सूं बाबजी हुकुम री लाम्बी उमर सारु इमरत उछ्छब रै रूप में 'मारवाड़ महोत्सव' मनावैला। इणीज दिन परबतसर तेसिल रा राजपूतां रो स्नेह मिलन समारोह भी टापरवाड़ा में तैवड़ीज्यो है।
Marwar Mahotsav कार्यक्रम री रूपरेखा
इण कार्यक्रम रा संयोजक श्री विक्रमसिंह टापरवाड़ा है। ओ कार्यक्रम श्री चारभुजा सेवा समिति परबतसर रा सौजन्य सूं हुवैला।
कार्यक्रम में बाबजी हुकुम री लाम्बी उमर सारू गायत्री शक्तिपीठ, पुष्कर, श्री समतारामजी महाराज, नांद गौशाला,अजमेर दरगाह रा दिवान ज़नाब जैनुअल़ आबैदीन साहेब, पुष्कर गुरूद्वारा रा ग्रंथी जी संत सुखविंद्रसिंह जी अर निर्भयपुरी आश्रम रा श्री शंकरपुरी जी महाराज पीलवा,रै सानिध्य में गायत्री जिग्य हुवैला।
आप हूसी Marwar Mahotsav रा पावणा
इणरै सागै इज इण कार्यक्रम रा ख़ास पावणा श्री मानसिंह जी किणसरिया,(पुर्व विधायक परबतसर, श्री धर्मेंद्र राठौड़ (पुर्व आरटीडीसी अध्यक्ष)हुवैला।
इण औसर माथै बाबजी हुकुम शहीद पत्नियां अर न्यारा न्यारां खेतरां में उल्लेखजोग कारज करबाळां नै सम्मानित करसी।
इण उछ्छब री अध्यक्षता श्री महेशपाल सिंह जी राठौड़ ,(बड़ू ठाकुरसाहब) करसी। लारला सौ बरसां में ओ पैलो औसर है जद बाबजी हुकुम सारु कोई ऐड़ो उछ्छब नागौर जिला में तेवड़ीज्यो है।
मारवाड़ रा सूरज महाराजा गजसिंह सा बढावसी Marwar Mahotsav रो मान
लोकतांत्रिक भारत में आज भी जोधपुर महाराजा श्री गजसिंह जी (बाबजी हुकुम) सारु मारवाड़ री सगळी पिरजा में आदरभाव है, आ बात इणारा लूंठा व्यक्तित्व नै और उजास देवै।इण दिन सांच्याणी टापरवाड़ा री धरती माथै दोय सूरज उजाळो करसी।एक पिरथी पालक अर दूजो पिरजापालक।
~~~~~~~भवानीसिंघ राठौड़ 'भावुक'
टापरवाड़ा(नागौर)
कोई टिप्पणी नहीं:
एक टिप्पणी भेजें