राजस्थानी रामलीला रै मंचन सारू भूमि पूजन अर धजा थरपणा

राजस्थानी रामलीला रै मंचन सारू  भूमि पूजन अर धजा थरपणा 

●आखै जग में एकमात्र रामलीला जकी राजस्थानी में हुवै।

सूरतगढ 28 सितम्बर ( मनोज ) राजस्थानी भासा री  मान्यता सारू लगोलग हुवणवाळै  संधरस री कड़ी रै रुप में राजस्थानी भासा मांय खेलीजण  वाळी आखै जगत री अेकलपी   रामलीला जिणरै  इण बरस  रै  मंचन सारू  ब्राहमण धरमसाळ रै मंच पर जमीं पूजन अर धजा थरपणा करीजी । खास बात है कै इण  राजस्थानी रामलीला रै पोथी  सरूप रो  विमोचन पैलड़ा राज्य मंत्री औंकारसिंघ लखावत , डाः राजेन्द्र बारहठ , डाः चेतन स्वामी , प्रमोद शर्मा , बाबूलाल शर्मा अर डाः गौरी शंकर निमिवाल रै हाथां हाजर सैकड़ो भासा हेताळुवां  री साखी में हुयो हो । भूमि पूजन में सिरै यजमान राजस्थानी भाषा मान्यता संघर्ष समिति रा जिलाध्यक्ष - पालिकाध्यक्ष परसराम भाटिया हा । इण मौके पर भाटिया कैयो कै  भासा री मान्यता री लड़ाई विगत सत्तर बरसां सूं प्रदेशवासी लड़ रैया है पण  केन्द्र व राज्य सरकार जनता री आवाज री अणदेखी करै है । राजस्थानी रामलीला के मिस म्हे सनातन रै  साथै साथै  संघरस को चरूड़  कर रैयां हां । भाटिया  राजस्थानी रामलीला रै सांतरै  मंचन री  कामना करी । 

इण मौके पर राजस्थानी रामलीला मंचन अर मान्यता संघरस सूं  जुड़या , भीम जोशी , यशपाल  शर्मा , महावीर भोजक , ब्राहमण धरमसाळ , पारीक महासभा रा कन्हैयालाल पारीक , प्रदीप बाजीगर , संजय बिश्नोंई , राहुल बिश्नोई , प्रमोदकुमार , व्याख्याता राकेश शर्मा , राजेश लाम्बा , दिनेश बावरा , तपेश कुमार , समाजसेवी पुनम तावणिया , सत्यनारायण तावणिया , मुरलीधर उपाध्याय , महावीर राजपुरोहित , संजय चौधरी , अशोक स्वामी , दीपक , मनोज बागवान , तनुज आद सणै भासा रा  हेताळू हाजर  रैहया । इण मौके पर राजस्थानी रामलीला रा सिरजक केन्द्रीय साहित्य अकादेमी सूं पुरस्कृत मनोजकुमार स्वामी कैयो कै राजस्थानी साहित्य मे ही सै सूं बेसी  भगती अर सगती रो निराळो संजोग देख्यो जा सकै है । जिणरो पड़तख  उदाहरण राजस्थानी रामलीला रो मंचन है । जिको मंच रै  साम्ही दरसकां रै साथै साथै   लाईव प्रसारण रै  मिस आखै जगत मांय बैठ्या  राजस्थानी भासियां रो देखीजणी है  अर भासा री मान्यता री मांग नें सैचनण करै  है । खास जिकर जोग  है कै  इण राजस्थानी रामलीला रो लाईव प्रसारण विगत तीन बरसां सूं लंदन सूं  भासा हेताळूवां री ओर सूं करयो जावै है ।  इण बरस रो  मंचन सैहर  रै काळजै  ब्राहमण धरमसाळ  रै सांवठै  मंच पर 15 अक्टूबर सूं दसरावै तांई हुसी । 

लारलेै बरसां दांई  इण बार भी इण राजस्थानी रामलीला रो  लाइव प्रसारण जै जै राजस्थान , आपणो राजस्थान आपणी राजस्थानी पेज , मरूवाणी यूट्यूब अर चैनल नम्बर 10 RM गोल्ड पर देख्यो जा सकैलो ।

इण मौके पर जोशी परवार री ओर सूं पालिकाध्यक्ष परसराम भाटिया अर मनोजकुमार स्वामी ने दुशाला उढायर वां रो सनमान करयो ।