राजस्थानी भासा री मानता सारू खेलीजण वाळी देस री पैली राजस्थानी रामलीला रो मंचन 7 अक्टूबर सूं सरू
सूरतगढ
आजादी रै 70 बरसां पछै ई आपणी मायड़ भासा राजस्थानी री मानता री मांग नै लेय'र राजस्थानी लोग रंगमंच रै मार्फत आपरी अवाज सिरकारां तांई पूगती कर रैया है। देस री पैली अर अेकली राजस्थानी रामलीला लगोलग 7 वें साल ई खेलीजैगी। संस्था रा पाटवी ओम साबणिया बतायो कै सूरतगढ रै वार्ड नं 5 मै मंचन 7 अक्टूबर सूं 16 अक्टूबर तांई चालसी।
इण रामलीला मै संवाद, लोकगीत, पैरान सगळो किं राजस्थानी होसी । कलाकार राजस्थानी अंदाज मांय आपरो अभिनय लोगां नै दिखासी। रामलीला रा सिरजक मनोज कुमार स्वामी बतायो कै आजादी सूं लेय'र हाल तांई भासा री आजादी सारू राजस्थानी लोग लड़ रैया है। राजस्थान नै भौगोलिक आजादी तो मिलगी पण भासा री आजादी कोनी मिली। इण रामलीला रो प्रसारण जै जै राजस्थान फेसबुक री टीम करसी। इण रो संचालण लंदन सूं हनुवंतसिंह राजपुरोहित संभाळसी। रामलीला री सगळी त्यारी पूरी करली।
मायड़ भासा राजस्थानी री मान्यता री अलख जगावती आखै देस दुनियां री अेकलपी राजस्थानी रामलीला रै सातवें बरस रै मंचन री त्यारियां जोरां सूं चाल री है ।
इण बरस री लीला री विगतवार
रोजिनां सिझ्यां 9 बजे सूं 11 बजे तांई
पैली रात री लीला - 7 अक्टूबर
नारद मोह, सरवण - मरण, रावण - नंदी संवाद
दूसरी रात री लीला - 8 अक्टूबर
राम - जलमd, ताड़का - वध, विश्वमित्र - मारीच संवाद
तीसरी रात री लीला - 9 अक्टूबर
सीता - स्वंयवर, लिछमण - परसुराम संवाद
चौथी रात री लीला - 10 अक्टूबर
राम - बनवास, कैकयी - दशरथ संवाद
पांचवी रात री लीला - 11 अक्टूबर
भरत - मिलाप
छठी रात री लीला - 12 अक्टूबर
सीता हरण, खर - दूसण वध, राम सूग्रीव मितरता
सातवी रात री लीला - 13 अक्टूबर
हड़मान - रावण संवाद, लंका दहन
आठवी रात री लीला - 14 अक्टूबर
अंगद रावण संवाद , मेघनाद लिछमण संवाद, लिछमण मुरछा , संजवणी बूंटी ल्यावणी
नौवी रात री लीला - 15 अक्टूबर
मेघनाद वध, सुलोचना सती, अहिरावण वध, नारांतक वध, राम रावण जुध
दसवी रात री लीला -16 अक्टूबर
राजतिलक
मान सम्मान
सांस्कृतिक आयोजन
कोई टिप्पणी नहीं:
एक टिप्पणी भेजें