कान खोलगे सुण अयोध्या रा राजा....
सातवें बरस राजस्थानी रामलीला रो मंचन फैर सरू
सूरतगढ
राजस्थानी भासा री मानता री मांग नै लेय'र निरवाळै ढंग सूं खेलीजण वाळी राजस्थानी रामलीला रो मंचन 7 वें साल सरू होग्यो। पैली रात री लीला रा सिरै पावणा पैलड़ा विधायक गंगाजळ मील, पालिका पाटवी ओमप्रकाश कालवा, राजस्थानी भासा संघर्ष समिति रा जिला पाटवी अर पार्षद परसराम भाटिया, राजेंद्र उपाध्याय महेंद्र सिंह जाटव आद पावणा रै रूप मांय लीला रो उद्घाटन भगवान बिनायकजी री आरती कर'र करी। पैलड़ा विधायक गंगाजळ मील केयो कै आपणा धार्मिक ग्रंथ आपां नै मिलजुल रेवण री सीख देवै। राजस्थानी रामलीला रो मंचन अेक पंथ अर दो कारज वाळो काम है जठै हरि कीर्तन रै साथै आपणी भासा री मानता रो हेलो अर राजस्थानी संस्कृति अर संस्कारां री बातां देस विदेसां तांई इंटरनेट रै माध्यम सूं पूगै। मील कलाकारां री बडाई करतां थकां केयो कै आपणी मायड़ भासा राजस्थानी नै भोत बेगी मानता मिलसी।
पालिका पाटवी ओमप्रकाश कालवा केयो कै भासा री लड़ाई खातर नगर पालिका मंडल सूरतगढ हरमेस आगै आय'र काम करसी। बां केयो कै सूरतगढ रै लोगां राजस्थानी भासा री मानता खातर भोत खैचळ खाई है। इण रो फळ जरूर मिलसी। परसराम भाटिया केयो कै जकै दिन राजस्थानी नै मानता मिलसी उण दिन राजस्थानी रामलीला सूरतगढ रो नांव सोनलियै आखरां मै लिखिजसी। आपां 72 बरसां सूं राजस्थानी भासा री मानता खातर काम कर रैयां हां पण केन्द्र अर राज्य दोनूं सिरकारां आपणी बातां कानां ई कोनी ढोळै नी। इण सूं पूरै राजस्थानी समाज मै घणो रोष है। पण आपां घणी सबळाई सूं आ लड़ाई लड़स्या अर जीतस्यां।
बीती रात री लीला मै नारद मोह री लीला जिणमै दिखायो गयो कै कामदेव नै जीत्यां पछै नारद नै घणो गुमैज हो जावै पण भगवान विष्णु नारद रो अभिमान मर्दन करै तो नारदजी आपरी गळती मान लेवै। इण रै पछै राजा दशरथ सरवण नै तीर सूं मार देवै अर आंधा मात पिता विलाप करै जद देखणिया री आंख सजळ हो जावै। रावण नंदी संवाद सुण'र लोगां घणी ताळी बजाई।
संस्था रा पाटवी ओम साबणियां, रूखाळणहार रामेश्वरलाल स्वामी , तेजपाल सिंघ पावणा रो सनमान करयो। राजस्थानी रामलीला के सिरजक मनोज कुमार स्वामी, निदेशक अमरिश ज़ंवरिया बतायो कै लारलै अेक महीनै सूं सगळा जणा घणी खैचळ खाय'र आ राजस्थानी री जगमग जोत जगा राखी है।
कलावंत दिखाई आप री कला :-
विष्णु - मनोज सुथार ,शिव -रामानंद बिशनोई,बिरमाजी- सुजित ,नारद - प्रदीप बाजीगर ,योगमाया - सोनू सोनी ,इन्द्र - कुलदीप स्वामी ,कामदेव - पुनित ,लालदेव - तपेश ,काळोदेव - राजकमल ,मंत्री इन्द्र - कमल वर्मा , कामदेव रै साथै विशाल वर्मा ,राजा शीलनिधी - संजय बिश्नोई, रावण - देव भारती , कुंभकरण - सोनू नायक , विभिषण - संदीप भाम्भू ,नंदी - प्रदीप बाजीगर, मारीच - यश वर्मा ,सरवण - निखिल स्वामी ,माता - तपेश , पिता - राजकमल ,
छोटो मेघनाद - कमल वर्मा, दशरथ - अमित कल्याणा, दशरथ मंत्री - सूर्य स्वामी ,वशिष्ठ - इमरान , हंसाणिया कलाकार - विकी नंदा आप री कला सूं सगळा नै घणा हंसाया।
कोई टिप्पणी नहीं:
एक टिप्पणी भेजें