Nunwo Rajasthan News Portal

हर ख़बर, साँची ख़बर

Breaking

Post Top Ad 2

Your Ad Spot

सोमवार, 29 अप्रैल 2024

नेम प्रकाशन राजस्थानी भाषा पुरस्कारां री घोषणा,राजस्थानी भाषा रै 28 श्रेष्ठ साहित्यकारां रो हुवैला सनमान


नेम प्रकाशन राजस्थानी भाषा पुरस्कारां री घोषणा

● भाषा रै 28 श्रेष्ठ साहित्यकारां रो हुवैला सनमान


●51000/ रो रूपचंद समदड़िया राजस्थानी साहित्य शिखर सम्मान जहूर खाँ मेहर, जोधपुर नै

●साहित्यकारां रो सम्मान समारोह अदितवार 9 जून 2024 दिनुगे 10 बज्यां हुवैला

नागौरः (पवन पहाड़िया,डेह) pavan pahariya,dehराजस्थान प्रदेश में होवण वाळै भाषा अर साहित्य सूं जुड़्या आयोजनां मांय सूं एक उल्लेखणजोग अर अनूठो ‘‘राजस्थानी भाषा साहित्य पुरस्कार महोत्छब, डेह’’ आवण वाळै जून महीनैं में नागौर जिले रै डेह कस्बै में कुंजल माता मंदिर मांय आयोजित हुवैला। अखिल भारतीय राजस्थानी भाषा मान्यता संघर्ष समिति अर नेम प्रकासण, Nem prakashan डेह री भेळप में होवण वाळो ओ सालाना जळसो आपरी परकत रो निकेवळो आयोजन है, जिणमें आज ताणी मायड़भाषा राजस्थानी रा 80 साहित्य-साधक पुरस्कृत हो चुक्या है। इण बार बरस 2024 में कुल 28 राजस्थानी साहित्यकारां नैं न्यारी-न्यारी विधावां में लेखण-सिरजण अर भाषा-संस्कृति पेटै कर्योड़ी घणमोली सेवावां सारू पुरस्कृत किया जावैला। इण विध 2024 में नेम प्रकासण कानी सूं 108 मूंघै मोतियां री अेक ऊजळी माळा मायड़भाषा पेटै गूंथीज जावैला, जकी आवण वाळी पीढ़ियां नैं प्रेरणा देवती रैवैला।

जळसा आयोजन समिति रो अध्यक्ष पवन पहाड़िया, संयोजक लक्ष्मणदान कविया, संरक्षक सुखदेवसिंह गाडण अर सूत्रधार डॉ. गजादान चारण बरस 2024 रै भाषा-साहित्य-पुरस्कारां री घोषणा करतां बतायो कै पुरस्कृत होवण वाळै सब साहित्य साधकां नैं श्रीफळ, शॉल, साफो, सनमान पानो, सैनाणी अर साहित्य साथै नकद राशि भेंट कर पुरस्कृत करीजैला। कुल 28 पुरस्कारां मांय सूं 27 सारू ग्यारह-ग्यारह हजार री नकद धनराशि निर्धारित है, बठैई रूपचंद समदड़िया राजस्थानी विशेष सेवा शिखर सम्मान सारू 51000/- पुरस्कार राशि भेंट करीजैला।

बरस 2024 में नेम प्रकाशन कानी सूं 1. नेमीचंद पहाड़िया राजस्थानी पद्य पुरस्कार ‘गम्योड़ा समदर रा सपना’ कृति सारू विजयसिंह नाहटा-जयपुर नैं, 2. अमराव देवी पहाड़िया राजस्थानी गद्य पुरस्कार ‘राजस्थानी काव्य में सिणगार’ कृति सारू डॉ. जितेन्द्र निर्मोही-कोटा नैं, 3. सोहनीदेवी सूरजमल पांड्या राजस्थानी व्यंग्य पुरस्कार ‘बिना लिखियोड़ी पोथी री भूमिका’ कृति सारू कृष्णकुमार ‘आशु’-श्रीगंगानगर नैं, 4. कमलादेवी पहाड़िया राजस्थानी उपन्यास पुरस्कार ‘धिंगाणै धणियाप’ कृति सारू डॉ. रेणुका व्यास ‘नीलम’-बीकानेर नैं, 5. मोहनदान गाडण स्मृति राजस्थानी भक्ति काव्य पुरस्कार ‘सिद्ध शिवदानपुरी गोड़ागड़ चरित’ कृति सारू महादान सिंह बारहठ-भादरेश नैं, 6. सोहनदान सिंहढायच स्मृति डिंगल काव्य पुरस्कार ‘श्रीकृष्ण रुकमणी ब्याव’ कृति सारू हिम्मतसिंह उज्ज्वल ‘भारोड़ी’ नैं, 7. जुगलकिशोर जैथलिया राजस्थानी भाषा सेवा सम्मान ‘‘30 बरसां री राजस्थानी भाषा मान्यता सेवा सारू डॉ. राजेन्द्र बारहठ-जोधपुर नैं, 8. गोपीलाल चैनसुख सेठी राजस्थानी साहित्य पुरस्कार ‘राजस्थानी लोक संस्कृति री ओळखाण’’ कृति सारू डॉ. कृष्णलाल विश्नोई-बीकानेर नैं, 9. कंवरलाल मच्छी राजस्थानी महिला लेखिका पुरस्कार ‘हेत रो परवानो’ कृति सारू विमला नागला-केकड़ी नैं, 10. चण्डीदान देवकरणोत बारहठ राजस्थानी अनुवाद पुरस्कार ‘तजरबो’ कृति सारू गौरीशंकर प्रजापत-बीकानेर नैं, 11. अमितसिंह चौहान राजस्थानी बाल साहित्य पुरस्कार ‘मरुधर आई बिरखा राणी’ कृति सारू शिवराज भारतीय नैं, 12. गोपालसिंह उदावत राजस्थानी वय वन्दन पुरस्कार ‘60 बरसां री राजस्थानी साहित सेवा’ सारू  भवानीशंकर व्यास ‘विनोद’-बीकानेर नैं, 13. सेठ भंवरलाल बेताला राजस्थानी गद्य पुरस्कार ‘तिरसो दरियाव’ कृति सारू सत्यदीप-श्रीडूंगरगढ़ नैं, 14. राजकंवर सिंहढायच राजस्थानी भाषा लोक कलाकार पुरस्कार ‘30 बरसां री ‘राजस्थानी लोकगीत गायन’ सेवा सारू श्रीमती सीमा मिश्रा-जयपुर नैं, 15. नाथूराम चौधरी राजस्थानी जात्रा वृत्तांत अर कहाणी पुरस्कार ‘दरखत री मुगती अर दूजी कहाणियां’ कृति सारू वाजिद हसन काजी-जोधपुर नैं भेंट करीजसी।

इण कड़ी में 16. केशवदान सांदू शिव राजस्थानी पद्य पुरस्कार ‘चालूं अै बाई छियां ढळगी’ कृति सारू विनोद स्वामी-परलिका नैं, 17. बख्तावर दान जुगतावत पारलू राजस्थानी निबंध पुरस्कार ‘जुगाड’ कृति सारू रामजीलाल घोड़ेला-लूनकरणसर नैं, 18. बलदेवराम छीलरा राजस्थानी साहित्य पुरस्कार ‘दुरगौ बाबौ’ कृति सारू मोहनलाल गहलोत-जोधपुर नैं, 19. वैद्यराज बंशीधर पारीक राजस्थानी पर्यावरण वानिकी पुरस्कार ‘कंद मूळ फळ’ कृति सारू श्री सी.एल. सांखला-कोटा नैं, 20. शिम्भुराम धोळया राजस्थानी साहित्य पुरस्कार ‘मगरै रौ मोती मिनजी रतनू’ कृति सारू भँवर पृथ्वीराज रतनू ‘दासोड़ी’-बीकानेर नैं, 21. मोहनलाल टोगसिया राजस्थानी पैली पोथी पुरस्कार ‘इत्ती सी तो बात है’ कृति सारू रोशन बाफना-बीकानेर नैं, 22. गीतादेवी बजरंगदास गौतम राजस्थानी लघुकथा पुरस्कार ‘अटकळ’ कृति सारू घनश्यामनाथ कच्छावा-सुजानगढ़ नैं, 23. रतनकंवर ऊमरदान खिड़िया राजस्थानी साहित्य पुरस्कार ‘म्हारो प्यारो छापर ताल’ कृति सारू गौरीशंकर शर्मा ‘भावुक’-छापर नैं, 24. बाबा रघुनाथ राम बेनीवाल राजस्थानी बालसाहित्य गद्य पुरस्कार ‘संगत री रंगत’ कृति सारू कीर्ति शर्मा-नोहर नैं, 25. हरिदेवी शेराराम दंतुसलिया राजस्थानी संस्मरण पुरस्कार ‘बै बी कांई दिन छा’ कृति सारू हरिचरण अहरवाल-उदयपुर नैं, 26. रूपचंद समदड़िया स्मृति राजस्थानी भाषा सेवा शिखर सम्मान ‘साढे छह दशकों की श्रेष्ठ साहित्य सेवा’ सारू प्रो. जहूर खां मेहर-जोधपुर नैं, 27. मोहनराम छाबा राजस्थानी लेखन पुरस्कार ‘काठा काळजा वाळी पन्ना’ कृति सारू तरुणकुमार दाधीच-उदयपुर नैं, 28. दिलीपकुमार पहाड़िया राजस्थानी युवा पुरस्कार ‘मुगत आभौ’ कृति सारू पुनित रंगा-बीकानेर नैं, 29. प्र मिलादेवी पान्ड्या राजस्थानी अनुवाद पुरस्कार 'अनासक्ति योग' कृति सारू डॉ. बंशीधर तातेड़ बाड़मेर नै दियो जावैला।

नेम प्रकासण पुरस्कार 2024 सारू निर्णायक रै रूप में सर्वश्री लक्ष्मणदान कविया, पवन पहाड़िया, सुखदेवसिंह गाडण, डॉ. गजादान चारण, मीठेश निर्माही, डॉ. मीनाक्षी बोराणा, सांवलदान कविया, डॉ. रामरतन लटियाल, सुखदेव राव, श्रीराम वैष्णव, गोविंदसिंह कविया आपरी सेवावां दी।


कोई टिप्पणी नहीं:

एक टिप्पणी भेजें

Post Top Ad 3

https://1.bp.blogspot.com/-LCni8nj6Pf0/YTK0cUKNSsI/AAAAAAAAA0U/wVPSwz7KZ7oI9WshKzLewokpker4jMqRQCLcBGAsYHQ/s0/IMG-20210903-WA0020.jpg