राजस्थानी भाषा में अनुवादित पोथी " भारत रौ संविधान " रो विमोचन हुयो।
आज 3 सितंबर 2023 नै राजस्थानी भाषा , साहित्य एवं संस्कृति अकादमी बीकानेर री मारफत छपैड़ी अर राजस्थानी विभाग री पैलां री विभागाध्यक्ष डॉ मीनाक्षी बोराणा रै हाथां संपादित अर अनूदित "भारत रौ संविधान " पोथी रो विमोचन घणमानीता मुख्यमंत्री श्री अशोक गहलोत, श्री जयनारायण व्यास स्मृति भवन टाउन हॉल जोधपुर में कर्या।
इण औसर माथै शिक्षा , कला , साहित्य अर पुरातत्व विभाग राजस्थान रा मंत्री आदरजोग डॉ बी.डी. कल्ला ,राजस्थान राज्य मेला प्राधिकरण रा उपाध्यक्ष श्री रमेश बोराणा , राजस्थान संगीत नाटक अकादमी री अध्यक्ष श्रीमती बिनाका जेश मालू , जोधपुर स्हैर री विधायक श्रीमती मनीषा पंवार , लूणी विधायक श्री महेन्द्र बिश्नोई, बाल संरक्षण आयोग री अध्यक्ष श्रीमती संगीता बैनिवाल , शिक्षा ,कला . साहित्य अर पुरातत्व विभाग री प्रमुख शासन सचिव श्रीमती गायत्री राठौड़, जोधपुर महापौर श्रीमती कुंती देवड़ा , राजस्थान पशु पालन बॉर्ड रा अध्यक्ष श्री राजेन्द्र सोलंकी, राजस्थानी भाषा ,साहित्य एवं संस्कृति अकादमी रा उपाध्यक्ष डॉ भरत ओला , अर "भारत रौ संविधान " री सम्पादक अनुवादक डॉ. मीनाक्षी बोराणा रै सागै सैंकड़ूं कलाकारां , साहित्यकारां, पत्रकारां अर प्रबुद्धजनों री मौजूदगी में कर्या ।
विमोचन री बखत माननीय मुख्यमंत्री श्री अशोक गहलोत कह्या कै," संविधान रो राजस्थानी भाषा मे उलथो व्हैणो लूंठी उपलब्धि है अर इण सरावणजोग कारज सारु म्हे डाॅ मीनाक्षी बोराणा नै बधाई देऊं, अर इण पोथी रो अकादमी सूं छपणो भी अंजसजोग बतायो अर अकादमी नै भी बधाई दी ।
डॉ मीनाक्षी संविधान रा इण अनुवाद बाबत बतावता थका कह्यो," भारत रो संविधान संसार रो सैं सूं मोटो लिखित संविधान है। इणरा अनुवाद भारत री घणकरी भाषावां में व्हियो है। भारतीय संविधान रो राजस्थानी भाषा में ओ पैलो अनुवाद है जको.राजस्थानी भाषा में साहित्यिक उन्नति री दिशा में एक ठावो पावन्डो व्हैला।इणसूं राजस्थानी भाषा नै मज़बूती मिलैला अर आठवीं अनुसूची में राजस्थानी भाषा नै भैळण रो दावो मजबूत व्हैला।
हर ऐक नागरिक नै खुदरी मातृभाषा में संविधान रा प्रावधानां नै जाणणो अर समझणो उणरो मौलिक अधिकार है अर ओ मानवाधिकार भी है।
कोई टिप्पणी नहीं:
एक टिप्पणी भेजें