प्रदेश री पै'ली वंदेभारत रेल ने प्रधानमंत्री बुदवार नै विडियो कांनफ्रेसिंग रे दरम्यान हरी झंडी दिखा'र जैपर टैसण सूं रवाना करी।
जैपरः13 अप्रेल।
प्रधानमंत्री नरेन्द्र मोदी बुधवार ने दिल्ली ऊं वीडियो कॉन्फ्रेन्स रे मार्फत राजस्थान री पहली वंदे भारत रेलगाड़ी ने हरी झंडी बता र रवाना कीनी। उद्घाटन रेलसेवा बुधवार नेजयपुर ऊं दिल्ली कैंट बीचे चलायी ज्यी। आ गाड़ी गुरुवार ऊं अजमेर-दिल्ली कैंट बीचे सप्ताह मांय 6 दिन नियमित तौर ऊं चालेला। कार्यक्रम ने संबोधित करता थकां प्रधानमंत्री कह्यो के लारला दो महीना मांय छठी वंदे भारत रेलगाड़ी ने झंडी बतावणो वां रो सौभाग्य है। प्रधानमंत्री कह्यो के वंदे भारत रेलगाड़ियां मांय 60 लाख ऊं बत्ता मुसाफ़िर सफर कर चुक्या है। वे कह्यो के वंदे भारत रेलगाड़ी ऊं राजस्थान रा पर्यटन ने फायदो व्हेला। प्रधानमंत्री कह्यो के सरकार, राजस्थान मांय रेलां ऊं जुडाव माथे खास ध्यान दे रही है। वे कह्यो के तारंगाहिल ऊं अंबाजी व्हेता थकां आबूरोड़ तांई नुवी रेल लाइन बणावण सारू ई काम सरू व्हे ग्यो है। प्रधानमंत्री कह्यो के 100 साल ऊं बत्ती जूनी ई रेलवे लेण री मांग केन्द्र री मौजूदा सरकार पूरी कीनी है। प्रधानमंत्री कह्यो के रेलवे रा गेज मांय बदलाव अर दोवड़ी लैणां रो फायदो राजस्थान रा जनजातीय हलकां ने ई मिल्यो है। वे कह्यो के डूंगरपुर, उदयपुर, चित्तौडगढ़, पाली अर सिरोही जिलां मांय रेल ऊं जुड्या सुबीता बध्या है अर राजस्थान रा केई टेसन अमृत भारत स्टेशन योजना रा तैत विकसित कर्या जा रह्या है। प्रधानमंत्री कह्यो के लारला बरसां मांय केंद्र सरकार राजस्थान मांय रेलां ऊं जुडाव बधावण सारू केई जतन कीना। वे कह्यो के दिल्ली-मुंबई एक्सप्रेस वे ऊं दौसा, अलवर, भरतपुर, सवाईमाधोपुर, टोंक, बूंदी अर कोटा जिलां री जनता ने फायदो मिलेला। केंद्र सरकार राजस्थान रा सरहदी हलकां मांय ई कोई 1400 किलोमीटर लम्बी सड़कां बणावण माथे काम कर रही है अर राज्य मांय कोई एक हजार किलोमीटर लम्बी सड़कां और बणावण रो प्रस्ताव है। जयपुर जंक्शन ऊं वंदे भारत एक्सप्रेस ने राज्यपाल कलराज मिश्र, मुख्यमंत्री अशोक गहलोत अर रेल मंत्री अश्विनी वैष्णव हरी झण्डी बता र विहर कीनी। ईं मौके राज्यपाल कलराज मिश्र कह्यो के रेलवे ने बेहतर बणावण सारू कर्या जा रह्या कामां रा चोखा नतीजा निजर आ रह्या है। रेल मंत्री अश्विनी वैष्णव कह्यो के रेलवे ने आधुनिक, तेज अर सुरक्षित बणावण सारू लगातार कोशिश करी जा रही है। जयपुर टेशन माथे राख्यी ज्या कार्यक्रम मांय सांसद, विधायक अर जनता रा दूजा नुमाइंदा ई मौजूद हा। जयपुर जंक्शन ऊं रवाना व्ही वन्दे भारत गाड़ी रो गांधीनगर, बस्सी, दौसा, बांदीकुई, अलवर, रेवाड़ी, गुरुग्राम अर दूजा टेसनां माथे ढोल नगाडां सागे नाच गा र स्वागत करी ज्यो। वंदे भारत रेलगाड़ी ने देखण अर वां रा स्वागत सारू जनता रा नुमाइंदा, जनता अर मोटी तादाद मांय स्कूली टाबर तिरंगा ले र टेसणां माथे पूग्या।
कोई टिप्पणी नहीं:
एक टिप्पणी भेजें