सीमा राठौड़ 'शैलजा ' री पोथी सतरंगी आखर (राजस्थानी कविता संग्रै) रो लोकारपण

सीमा राठौड़ 'शैलजा ' री पोथी सतरंगी आखर (राजस्थानी कविता संग्रै) रो लोकारपण हुयो

●सीमा राठौड़ री  साहित्यिक जातरा रा कूं कूं पगल्या है सतरंगी आखर। ईं पोथी नै बांचणो घणो जरूरी है,पाठकां नै पोथ्यां सूं जोड़णो आज रा बखत में घणो जरूरी है-भवानीसिंघ भावुक

● कवि रा काळजा में ऊठण आळा भाव है जिका पलकां री कौर सूं  मोती बण'र कागद री गोद में आखर बण'र पळकै अर ऐ आखर ही पाठकां री निजरां चढ'र सीधा उणरे हिवड़ा ताणी पूगै-नारायणसिंघ राठौड़ 'पीथळ'

जै'पर: 06 अप्रेल।

हनुमान जैंती नै गुलाबी नगरी जैपर मांय सीमा जी राठौड़ 'शैलजा ' रो पैलो राजस्थानी कविता संग्रै रो लोकारपण हुयो। राजस्थानी साहित मांय फूटरा डिजाइन रै साथै यो पैलो कविता संग्रै है इण रा डिजाइनर सुरेश जी टेलर है। अठै दो कलावां रो संगम है। घणा दिनां सूं सगळा नै इण री उडीक ही यो कविता संग्रै आपरै नांव रै बाबत ई सतरंगो है।  नवाचार युवा पाठक नै राजस्थानी पढबा नै खींचै राजस्थानी री जिम्मेदारी अब युवा रै कांधै ई है। 

        इण कार्यक्रम रा मुख्य अतिथि मानीता नारायण सिंघ राठौड़ पीथळ राजस्थानी भासा साहित्य अर संस्क्रति अकादेमी बीकानेर, अध्यक्ष मानीता भवानी सिंघ राठौड़ 'भावुक ' संस्थापक अर संपादक ,नुंवो राजस्थान, श्री प्रदीप सिंघ सा राजावत, निर्माता अर निर्देशक, टेलीफिल्म ,डी डी राजस्थान, श्रीमती कामना राजावत, मरूधरा कार्यक्रम संचालक डी डी राजस्थान अर मानद कर्नल पार्वती जांगिड़ सुथार, चैयरपर्सन: युवा संसद भारत,इलेक्टेड प्रेसिडेंट : रिपब्लिक ओफ वुमन यै मूंगा पावणा सतरंगी आखर री जाजम माथै विराजमान हा । भवानी सिंघ राठौड़ 'भावुक ' आपरा विचार राख्या कै सीमा राठौड़ री  साहित्यिक जातरा रा कूं कूं पगल्या है सतरंगी आखर। ईं पोथी नै बांचणो घणो जरूरी है,पाठकां नै पोथ्यां सूं जोड़णो आज रा बखत में घणो जरूरी है। नारायण सिंघ राठौड़ ' पीथळ 'बताया कविता कवि रा काळजा में ऊठण आळा भाव है जिका पलकां री कौर सूं  मोती बण'र कागद री गोद में आखर बण'र पळकै अर ऐ आखर ही पाठकां री निजरां चढ'र सीधा उणरे हिवड़ा ताणी पूगै। 

 श्रीमती कामना राजावत बताया सीमा राठौड़ री कवितावां सीधा सबदां में समाज रो चितराम है  कवितावां मांय मीठी बात करणै आळा घणा है पण खरी अर खारी बात लिखणिया आज कम रैया है सीमा जी री दबंग कलम है।

कर्नल पार्वती जांगिड़  सुथार बताया कै महिला साहित्यकारां रो साहित्यिक सिरजण मां पारबती री तपस्या जैड़ो है,घर परिवार री जिम्मेदार्यां नै पूरी कर'र बै समाज नै साहित्य सूंपै।प्रदीप सिंघ राजावत बताया कै सतरंगी आखर पोथी मायड़ री सिपाई सीमा राठौड़ 'शैलजा ' री राजस्थानी भासा री मानता खातर हूंकार है।इण मांय राजस्थानी संस्क्रति रा सतरंगा चितराम है।  

मीडिया सूं श्री विराज सिंघ शेखावत,करां हथाई चैनल , श्री हनुमंत चारण , रिपोर्टर डी डी राजस्थान बठै विराजमान हा। पत्र वाचन श्रीमती सुमन राठौड़ अर संचालन श्री तेज सिंघ राठौड़ करिया। महिला साहितकार सुनीता जी बिश्नोलिया , श्रीमती मान कंवर मैना, मीनाक्षी पारीक,मनीषा आर्य सोनी,मोनिका सुरोलिया अर एडवोकेट शिवेन्द्र सिंघ राठौड़, श्री रवीन्द्र सिंघ शेखावत संतोष शेखावत, अंजना, दिव्या , अक्षिता, मनस्वी,हर्ष, सोनल, शौर्य, गौरी अर सगळो राठौड़ परिवार बठै हो।