राजस्थानी रामलीला रो फिल्मांकन हुयो सरु- मनोज स्वामी
●लगोलग सात बरसां सूं खेलीजै राजस्थानी रामलीला
● 25 सितम्बर सूं हुवैला प्रसारण।
सूरतगढ : 2सितम्बर। लारला सात बरसां सूं खेलीजण आळी राजस्थानी रामलीला में इण बरस सूं नुंवो नवाचार हुयो। इण लीला ऱो फिल्मांकन ग्रीन स्क्रीन माथै आज गणेश जी महाराज री अर पदमश्री सीताराम लाळस रा राजस्थानी सबदकोश री पूजा-आरती रे पछै विधि विधान सूं, स्वामी फिल्म स्टुडिओ, सूरतगढ में सरू हुयो।
इण टाणै सिरै पावणा सर्व श्री सूरतगढ सूं पधार्या लोकतंतर सैनानी, वरिष्ठ रामलीला कलाकार, पार्षद आदरजोग मुरलीधर व्यास, गंगानगर सूं आर. एन. गोल्ड चैनल रा संस्थापक आदरजोग संजय कटारिया, राजस्थानी पारिवारिक मासिक पत्रिका (वेब-मैग्जीन) रा संपादक भवानीसिंघ राठौड़ 'भावुक' ,टापरवाड़ा नागौर स्यूं अर दैनिक अख़बार ब्लास्ट री आवाज रा संस्थापक महेंद्र जी जाटव सूरतगढ भी मौजूद हा।
राजस्थानी रामलीला रा लिखारा, निर्माता निर्देशक वरिष्ठ साहित्यकार मनोज कुमार स्वामी बताया कै, इण रामलीला रो लारला दो बरसां सूं जागतिक सीधो प्रसारण, सोशल मिडिया रे मारफ़त करता आया हां। पण कीं कम्यां रै जावती अर दरसकां रो ओळमो रैवतो क आवाज़ साफ कोनी सुणीजै। उणारी इण शिकायत सूं सीख लेय'र अबकाळै ई रामलीला रो स्टुडिओ में फिल्मांकन सरु करण री तैवड़ी जी सूं देस परदेस में बिराजियोड़ा दरसकां नै कलाकारां रा सम्वाद साफ सुणीज सकै।
इण टाणै सिरै पावणा मुरलीधर व्यास कह्यो ," राजस्थानी रामलीला रा इण डिजीटल प्रसारण सूं आखी जगती में बिराजियोड़ा राजस्थानी भाई सैणां ताणी आपणी मां भासा राजस्थानी में भगवान श्री राम री लीला पुगावण रो ओ मेहताऊ काज है। राजस्थानी भासा रा पसराव अर बिगसाव में आ आपरी ठावी ठौड़ राखे। "
सिरै पावणा श्री संजय कटारिया इण टाणै आपरी मनगत बखाणतां थकां कह्यो, " राजस्थानी रामलीला रा निर्देशक अर कलाकारां रै साथे इज इण नै दैखण आळा किरोड़ूं राजस्थानी भाई सैणां नै बधाई अर लखदाद कै आप बड़भागी हो जिका इण पावन औसर रा भागीदार बण्या।"
नागौर सूं पधारेड़ा कवि लिखारा भवानीसिंघ राठौड 'भावुक' कह्या ," राजस्थानी साहित्य में आपणा धर्म ग्रंथां री पोथ्यां , वेलि क्रिस्ण-रुकमणी, ब्रिजदासी भागवत, पद्मायण रे सागै इज राजस्थानी रामलीला रो नांव इण ठावी ठौड़ां पूगावण सारु आदरजोग मनोज स्वामी नै घणा घणा रंग, आपरी मायड़भासा री पीड़ अर इणनै जीवती राखण सारु आपरी इण ख़ास खैचळ नै राजस्थान री आवण आळी पीढ्यां कदै इज बिसार नीं सकै, आ रामलीला आपणा काळजा री कोर बणै, हिवड़ा रो हार बणै, राजस्थानी भाषा री मानता रा मारग रो लूंठो आधार बणे।'"
इण मौके महेंद्रजी जाटव कह्या," आ म्हा सूरतगढ रा बासिंदा सारु गुमेज री बात है के भाषा री मानता रा इण होम में म्हे बखत बखत माथै म्हारी आहुत्यां दीन्ही, अर अजै भी इण रामलीला रै मारफत म्हे आ छोटी सी'क खैचळ कर रिया हां, इण रामलीला में काम करण आळा सगळा कलाकारां , अर भाई मनोज जी स्वामी री अणथक मैणत रो सुफळ जरूर मिलसी।'"
इण रामलीला रो प्रसारण 25 सितम्बर सूं जै-जै राजस्थान रा फेसबुक पाना, आर. एन. गोल्ड चैनल, अर नुंवो राजस्थान न्यूज पोर्टल रा यूट्यूब चैनल अर दूजा सोशल मिडिया माथै लगोलग हुवैला।
कोई टिप्पणी नहीं:
एक टिप्पणी भेजें