Nunwo Rajasthan News Portal

हर ख़बर, साँची ख़बर

Breaking

Post Top Ad 2

Your Ad Spot

गुरुवार, 31 मार्च 2022

राजस्थानी मान्यता सारूं अरज कोनी सुणै सरकारां:जमानो आंख्यां राती कर लठ दिखावणै रो- करणीदानसिंह राजपूत

राजस्थानी मान्यता सारूं अरज कोनी सुणै सरकारां:जमानो आंख्यां राती कर लठ दिखावणै रो- करणीदानसिंह राजपूत 
राजस्थान थरपणा दिवस माथे 30 मार्च नै राजस्थान मांय  ठोड़ ठोड़ राजस्थानी भाषा नै मान्यता देवणे री मांग सारूं खुला मंच सजाया गया। खुला मंचा माथै बातचीत हुयी, गीत नाच अर भाषण होया। 
 बातां सामी आई। राजस्थान सरकार राजस्थानी  मायड़ भाषा नै राजभासा घोषित करै। भारत सरकार संविधान री आठवीं अनुसूचि मांय सामल करे।
कार्यक्रमां मांय राजस्थानी भासा रा विदवानां,राजस्थानी भासा रा प्रेमियां आम नागरिकां पत्रकार रचनाकारां कलाकारां लोग अर लुगायां राजस्थानी री ताकत री बात राखी।

अलग अलग राजनीतिक दलां रा नेता भी सामल होया। राज नेतावां नै अरज करी गई कै
अ मंच सांझा है मिलजुल काम करस्यां इमें राजनीति रो मुद्दो कोनी।
आप आप रा विचार है। राजस्थानी मान्यता री मांग माथै आंदोलन करता लड़ता लड़ता चालीस साल बीत गया। ईं सूं बेसी हो ग्या। मायड़ भाषा राजस्थानी ना तो राजभाषा घोषित हो सकी अर ना राजस्थानी नै भारत सरकार सरकार संविधान री आठवीं अनुसुचि मांय सामल करी।
राजस्थान सरकार अर भारत सरकार सुणै कोनी अरज करता करता सालो साल बीत ग्या। आगै और कितरा साल अरज करता रैस्यां। अरज करणै सूं पार पड़ी कोनी अर आगै भी पार पड़ जासी इण रो भी भरोसो कोनी। 

राजस्थानी लोग अर रचनाकार बडाई मांय कैवता रैवे क लाठी लठ डांग रा बीसियों सब्द राजस्थानी मांय है। बडो सब्दकोस है। इण रो मुकाबलो दूजी भासा कोनी कर सकै।

पण आप सुणाता रैवो।डांग मारीजे कोनी। आपणी सुनवाई कोनी अर डांग आपणै सूं मारीजै कोनी। आपणा हालात ऐड़ा है कै  डांग मारणी तो दूर अआपणै सूं तो  सरकारां नै डांग दिखाईजै भी कोनी। डांग री ताकत दिखाया बिना ना राजस्थान सरकार पूछे अर न भारत सरकार पूछै।
सरकारां नै कोई ज्यादा काम कोनी करणो। राजस्थान सरकार नै तो राजस्थान री राजभाषा घोषित करणी  है अर भारत सरकार नै संविधान री आठवीं अनुसुचि मांय सामल करणी है।

अबकी बार राजस्थान थरपणा दिवस 30 मार्च 2022 पर नजरां ही। बिस्वास हो कै राजस्थान सरकार रा मुखमंत्री अशोक गहलौत घोषणा कर देसी। ओ बिस्वास अर भरोसा हवा मांय उड ग्यो। पूरो दिन खाली अर खाली निसर ग्यो।

जै डांग दिखायोड़ी होवती तो अशोक गहलौत री छींया भी बोल उठती। सरकार नै कीं डर भय होवै जणा काम करै। आपां हां तो रण बांकुरा पण कथा कहाणियां कवितावां कहावतां मांय हां। आपां जुद्ध करणो नीं चावां। राज नेतावां री पावांधोक करणै सूं साल दर साल बीत ग्या अर आगै भी बीत जासी। 
डांग मारो ना  पण दिखाओ तो सरी। राजस्थान सरकार अर भारत सरकार नै डांग दिखाओ तो सरी। डांग दिखाणै सूं भी डरो हो तो फेर किस्या रणबांकुरा हो। कूड़मूड़ रा रणबांकुरा हो। 

अब डांग मारया अर दिखायै बिना राजस्थानी बस्तै मांय बंद ही पड़ी रैसी। ओ नीं कर सको तो कागज पतर  में डांग रो चित्र बनाकर भेज्या करो। मंचा माथै राजस्थानी भासा मांग करणिया कहता रेवै क ओ राजनीति रो बिषय कोनी सारा मिलजुल करता रैस्यां। अरज करता रैवो अर मरता रैवो। कितरा रचनाकार सरग सिधार गया राजस्थानी री मान्यता री मांग करता। बींया जितरा नामी तो अब बच्या ही कोनी।
 बिना तलवारां कोई जुद्ध जीत्या है कांई।

ओ माननो ही पड़ेगो कै राजस्थानी री मान्यता रो असली मुद्दोराजनीति रो ही मुद्दो है। राजनीति रै कारण सूं ही मान्यता रुकी पड़ी है। 

चापलूसी करता रैवो सरकारां रै कीं फरक पड़ै कोनी। पैलां पार पड़ी कोनी अर आगे भी पड़ै कोई। कागज पत्तर लिखता रहवो पण राजनीति सूं दूर भागणो सही नहीं। राजनीति में भी आंख्यां दिखाओ। आंख्यां राती राती कर दिखाओ अर पाछै इण री ताकत अर फरक देख्या। । 
भारत सरकार भी मान सी। अर राजस्थान सरकार भी मान सी।
लठ अर डांग मारया बिना सरकारां डरै कोनी।  डांग चलावणै री बात तो करो। 
सबसे बड़ी बात तो आ है क  राजस्थान सरकार खनै तो बहानो भी है अर ओ सच भी है कै राजस्थान सरकार तो 2003 में प्रस्ताव पारित कर भारत सरकार ने भिजवा दियो। बो प्रस्ताव भारत सरकार खनै कागजां मांय कागज के रूप में कठैई पड़यो है फेंक्योड़ो सो।
भारत सरकार 2014 सूं तो साफ-सुथरी भारतीय जनता पारटी री है।भाजपा अर प्रधानमंत्री नरेंद्र मोदी जी सभ्यता संस्कृति री बातां करै। नई शिक्षा नीति मांय प्राथमिक पढ़ाई यानी के पांचवी तक पढ़ाई मायड़ भाषा में करणै री घोषणा कर चुकया है तो असली काम करणै सूं मूंडो क्यूं फेरै। भारत सरकार राजस्थानी नै आठवीं अनुसूची मांय सामल करै। राजस्थान रा जका सांसद है बै प्रधानमंत्री नरेंद्र मोदी जी सूं अर  गृहमंत्री अमित शाह सूं साफ-साफ बात करै। 
राजस्थानी रा आंदोलन करण वाला भारत सरकार रे गृह मंत्री नै बतावै क्यूं नीं कै राजस्थान रा लोग नाराज हो रैया है। 
राजस्थान प्रदेश मांय भारतीय जनता पार्टी वाला नेता भारत सरकार पर दबाव घालै कहवै कै भेदभाव बंद करयो जावै। 
राजस्थान सरकार 2003 मांय प्रस्ताव पारित कर भारत सरकार नै भेज दिनयो हो।  बो प्रस्ताव अजै ताईं भारत सरकार बिना बिना विचार करै क्यूं रोक राख्यौ है। 
गृहमंत्री अमित शाह सूं भी आ बात दबाव सूं पूछी जावै। 
एकर फेरूं सोच लो कै ओ राजनीति रो ही मसलो है। 
राजस्थानी भाषा मांग पूरी होवते ही राजस्थानी जवान लड़का लड़कियां रै वास्तै सरकारी नौकरी रा दरवाजा खुल जासी। राजस्थानी बेटा बेटी सरकारी नौकरी लागे,सरकारी अफसर बने तो राजस्थान सरकार अर  भारत सरकार नै डांग दिखाणी ही पड़सी। इसा काम बातां सूं कोनी चालै।
राजस्थान में 3 हजार सूं माध्यमिक विद्यालय उच्च माध्यमिक में क्रमोन्नत होया है। इण विद्यालयां मांय राजस्थानी साहित्य खुलवा देवो तो सीधी सट 3000 राजस्थानी पढया युवकां  ने अभी अध्यापक री नौकरी मिल जासी। आज जरूरत है जका राजनेता लोग राजस्थान विधानसभा रो 2023 रो चुनाव लड़न की तैयारी करण लाग रैया है बै राजस्थानी रे वास्ते आवाज उठावै अर उच्च माध्यमिक विद्यालयां मांय राजस्थानी विषय खुलावै। ओ काम कोई ज्यादा मेहनत नीं मांग। बस घरां सूं बारै निकलणो है। अठै रा नेतावां नै भी ने भी साफ-साफ डांग दिखानी चाईजै। 2023 मांय वोट बीं नै जको राजस्थानी विद्यालयां मांय खुलवासी भागदौड़ करसी। चुनाव सूं पैला अभी पढाई सरु होवणै सूं पैलां ओ काम करावै।
अब की बार नेताओं नै लठ दिखाणै की जरूरत है। भारत सरकार रा आम चुनाव 2024 मांय होसी जिका मांयअब कोई ज्यादा वक्त नीं बचयो।
ओ मुद्दो  राजनीति रो भी है बिना राजनीति करयां राजस्थानी ने मान्यता मिलनी दूर है। 

राजस्थान में राजभाषा घोषित कराणै मांय भी नजरां राती अर टेढी कर मांग करोगा जणा काम होसी। 
राजस्थानी भाषा साहित्य अकादमी रो अध्यक्ष ही कोनी। इण वास्तै भी इतरी ताकत भी कोनी कै राजस्थान सरकार ने राती आंख्यां दिखा सको। 
अकादमी रो अध्यक्ष पद सरकार सूं भरावणै मांय राजस्थानी रचनाकारों नै डर क्यूं लागै।
अब जमानो अरज रो कोनी। अरज रो बखत बीत ग्यौ। अब लठ लाठी डांग दिखाणै रो बखत है।आंख्यां राती कर दिखाणै रो बखत है।

कोई टिप्पणी नहीं:

एक टिप्पणी भेजें

Post Top Ad 3

https://1.bp.blogspot.com/-LCni8nj6Pf0/YTK0cUKNSsI/AAAAAAAAA0U/wVPSwz7KZ7oI9WshKzLewokpker4jMqRQCLcBGAsYHQ/s0/IMG-20210903-WA0020.jpg