आठवीं अनुसूची मं राजस्थानी नै जुडावण सारु लिख्यो प्रधानमंत्री नै कागद-अर्जुनलाल मीणा
●आडावळ रा भाखरां सूं ऊठी मायड़भासा मानता री मांग
उदैपुर: 14 मार्च। राजस्थानी भाषा नै संविधान री आठवीं अनुसूची में ठौड़ दिरावण सारु उदैपुर रा सांसद अर्जुनलाल मीणा कालै प्रधानमंत्री नरेंद्र मोदी नै कागद लिख्यो। इण बाबत बतावता थका श्री अर्जूनलाल जी कह्यो, " इण कागद मं म्हे लिख्यो कै म्हां पनरा करोड़ राजस्थानी मानखां री मां भाषा राजस्थानी नै अजै ताणी सिरकारां आठवीं अनुसूची मं ठौड़ कोनी दी है। लारला केई बरसां सूं अठै रा मिनख इण भाषा नै मान देवण अर इणरा बधेपा सारु लगोलग आपरी कोसीस कर रिया है। सन 2003 मं राजस्थान री उण बखत री सरकार एकमता सूं ऐक प्रस्ताव तियार कर्यो अर केंद्र री मंजूरी खातर भेज्यो पण अजै ताणी इणरो माकूल जवाब नीं आयो अर नीं ही अजै ताणी सिरकार इण नै आठवीं सूची मं भेळै करी। राजस्थानी मोट्यार परिषद रा अध्यक्ष डॉ. शिवदानसिंह जोलावास आपरै प्रतिनिधी मंडळ रे साथै म्हांसू मिळ्या अर मायड़भासा री मानता री मांग पाछी दोहराई। म्हे राजस्थानी मोट्यारां री इण मांग रो समर्थन करुं अर आदरजोग प्रधानमंत्री जी नै इण सारु कागद लिख्यो हूं। मन्नै आसा है प्रधानमंत्री आपांरी बात सुणेला अर बेगोइज कोई लूंठो निरणै भाषा री मानता सारु करैला।"
राजस्थानी मोट्यार परिषद रा संरक्षक मनोज कुमार स्वामी इण कारज सारु लाडेसर सांसद रो आभार मान्यो साथै इज मोट्यार परिषद रा महासचिव प्रह्लादसिंह झौरड़ा अर प्रदेश प्रवक्ता भवानीसिंघ राठौड़ 'भावुक' सांसद महोदय नै घणा धिनवाद दियो।
आपणी मायड़ भासा का'णे मोटो काज
जवाब देंहटाएं