भकरी शीतळा माता मेळा री सरुआत हुई, बाजां गाजां रै साथै शीतळा माता री सवारी गढ़ से नीचे पधारी
●गढ़ सूं सज धज के मम्माई,पुजण नै शीतळा नीचे आई
नागौरः24 मार्च। परबतसर तेसिल रा गांव भकरी मौलास रा गढ मं विराजित शीतळा माता री सवारी आज सिंझ्या 5:15 बज्यां साही लवाज़मा रै साथै बाजा गाजां रै साथै भकरी गढ सूं नीचे पधारी।इण रै साथै इज च्यार दिवसिय मैळा री सरुआत हुयी। माता जी री पूजा सुंवारै 4:30 बज्यां ठिकाणा री जनाना सिरदारां रै हाथ सूं सरु व्हैसी,इण रै पछै गांव री सगळी लुगायां पूजा करसी। साथै इज तारीख 25-26 मार्च नै मोट्यांरा अर लुगायां रो मैळो रहसी। तीन रात ताणी निचला मंड मं जठै मातेसरी बिराजमान है जागरण व्हैला। मातेसरी री सवारी मं भकरी ठिकाना रा ठाकुर साहब यशवंतसिंह मेड़तिया रै साथै ठिकाणा रा भाइपा रा गावां, टापरवाड़ा, नरमा, राजलोता, सूरजमोड़ी सूं पधारेड़ा सिरदार अर पुर्व विधायक मानसिंह किणसरिया, पुर्व प्रधान अजीतसिंह नैणिया, सूरज मोड़ी सरपंच प्रतिनिधी नरेंद्रसिंह राठौड़, सगा गनायत ठा. भंवरसिंह राजावत पखाळा सवाईमाधोपुर, भंवरसिंह नरुका ठिकाणा झाड़ला जिला जैपर ,जितेंद्रसिंह जोधा पिपळिया मंडी मध्यप्रदेश,भकरी अर आसै पासै रा गावां सूं पधारैड़ा गणमान्य भक्त मौजूद हा।
तारीख 27 मार्च नै सिंझ्या 5:15 बज्यां माताजी री सवारी पाछी गढ मं पधारसी उणरै पछै मैळा रो समापन व्हैसी।
मैळा री व्यवस्था री देखभाळ शीतळा नवयुवक मंडळ भकरी,पुलिस थाना पीलवा रे सैयोग सूं व्हैसी।
जै हो शीतला माता जी की 🙏🙏🙏
जवाब देंहटाएंजै माता जी की, बधायाँ सा
जवाब देंहटाएंमोकळी बधायां अर सुभकामनावां सा 🙏
जवाब देंहटाएं